Heddiw (3 Chwefror), anogodd Janet Finch-Saunders AS – yr Aelod o’r Senedd dros Aberconwy – breswylwyr i gymryd rhan yn yr ymgynghoriad ar symud Llyfrgell Llanrwst i lawr isaf Canolfan Fusnes a Chynadledda Glasdir.
Wrth ofyn am gyfraniadau, dywedodd Janet:
“Mae Llyfrgell Llanrwst yn gyfleuster poblogaidd a gwerthfawr sy’n parhau yn rhan bwysig o’r gymuned wledig hon, yn enwedig wrth ddarparu gwasanaethau hanfodol fel mynediad am ddim i’r cyhoedd at gyfrifiaduron.
“Mae Llyfrgell Llanrwst yn hyb cymunedol go iawn, gyda hanes o ddarparu grwpiau darllen, amser stori ar gyfer y plant lleiaf a dosbarthiadau addysg ddigidol. Hyd yn oed drwy’r pandemig, ac fel rhan o Lyfrgelloedd Conwy, mae Gwasanaeth Galw a Chasglu wedi’i gynnal, gan ein galluogi i ddal ati i bori mewn llenyddiaeth.
“O ystyried defnydd cynyddol o’r llyfrgell, mae swyddogion wedi hen gydnabod bod yr adeilad presennol yn rhy fach ac y byddai angen buddsoddiad sylweddol ynddo. Yn dilyn cau Canolfan Fusnes a Chynadledda Glasdir yn annisgwyl, maen nhw bellach wedi cynnig cynlluniau i symud i lawr isaf y Ganolfan.
“Y gobaith yw y bydd symud fel hyn yn galluogi’r llyfrgell i ddarparu cyfleusterau a gwasanaethau ychwanegol. Byddwn yn sicr yn annog preswylwyr lleol yn frwd i edrych ar y cynigion ar wefan Cyngor Bwrdeistref Sirol Conwy a chwblhau’r holiadur. Mae’r llyfrgell hon yn eiddo i ni i gyd, felly mae’n hanfodol bod eich llais yn cael ei glywed.”
DIWEDD
Nodiadau i Olygyddion
- Gellir gweld lluniadau o sut byddai’r llyfrgell newydd yn edrych ar wefan y gwasanaeth. Mae holiadur i etholwyr lleol ar gael i’w gwblhau ar-lein yn: conwy.gov.uk/llanrwstlibrary
Ffoto: Tom Hermans ar Unsplash