Fel rhan o'i hymgyrch hirsefydlog i wella diogelwch ffyrdd y fro, mae Janet Finch-Saunders AS Aberconwy heddiw (12 Ionawr) yn croesawu cynigion i adfer lled y llwybr troed blaenorol oedd yn arwain at groesfan A470 Glan Conwy, fel bod ceir sydd wedi'u parcio yn glir o'r llain welededd.

Daw'r cynllun newydd yn dilyn pryderon pobl leol am oryrru a gwelededd. Mae'n ganlyniad proses barhaus yr Aelod o ddeisebu ar y mater hwn, gyda swyddogion Llywodraeth Cymru a chynrychiolwyr yr Asiant Cefnffyrdd yn cyfarfod ar y safle yn ddiweddar i drafod opsiynau gwella. Fel mesur cychwynnol a dros dro, mae arwyddion ychwanegol wedi'u gosod ar ffyrdd sy'n nesáu at y groesfan.

Wrth sôn am y cam cadarnhaol ymlaen, dywedodd Janet:

“Yn dilyn pryderon a godwyd am ddiogelwch y groesfan sebra yng Nglan Conwy, roeddwn yn falch iawn o gyflwyno sylwadau brys i Lywodraeth Cymru a arweiniodd at gyflwyno arwyddion dros dro.

“Fe wnaeth swyddogion hefyd addo y byddai'n datblygu cynllun newydd o'r ffordd ddynesu a'r cyffiniau er mwyn gwella amlygrwydd i'r groesfan. Rwy'n falch iawn bod y dyluniad hwn bellach wedi'i gwblhau.

“Mae'r cynigion yn cynnwys cynlluniau i adfer lled blaenorol y llwybr troed sy'n arwain at groesfan A470 Glan Conwy, fel bod ceir wedi'u parcio yn glir o'r llain welededd. Mae hefyd yn cynnwys adleoli cylchoedd beicio yn ofalus er mwyn gwarchod pawb sy'n defnyddio'r ffordd.

“Ar ben hynny, mae'r cynlluniau newydd yn cynnwys peintio marciau 'ARAF/SLOW' newydd ar fatiau coch wrth i chi nesáu at y gyffordd, yn ogystal ag arwyneb llwydfelyn ffrithiant uchel ac ailbeintio'r marciau igam-ogam. Gyda'i gilydd, dylai'r rhagofalon hyn helpu gyrwyr i arafu mewn da bryd.

“Rwy'n parhau i ymrwymo i ddod o hyd i atebion synhwyrol i faterion traffig lleol sydd o fudd i ddefnyddwyr y ffordd a cherddwyr. Mae'r llwyddiant diweddar hwn yn dangos grym ymgyrchoedd lleol, gan sicrhau bod lleisiau a phryderon trigolion yn cael eu clywed gan y weinyddiaeth ym Mae Caerdydd.”

DIWEDD