Mae Janet Finch-Saunders, AS Aelod o Senedd Cymru Aberconwy wedi mynd ati heddiw (17 Awst) i groesawu tro pedol gan Lywodraeth Cymru a fydd yn golygu y bydd myfyrwyr Aberconwy yn cael y graddau a ragfynegwyd gan eu hathrawon.

Mae ei sylwadau’n dilyn llythyr brys cynharach i Weinidog Addysg Llywodraeth Cymru ar ran myfyrwyr lleol, lle’r oedd yr Aelod yn galw am i’r newid hwnnw gael ei roi ar waith. Rhybuddiodd am oblygiadau difrifol y system raddio a oedd wedi gwneud i fyfyrwyr Aberconwy ddigalonni’n llwyr, 'gan deimlo na allen nhw wneud cais i’r prifysgolion gorau gan nad oedd ganddyn nhw’r graddau uchel disgwyliedig.'

Gan gyfeirio ar y newid mewn polisi, dywedodd Janet:

"Rydw i’n croesawu’r newid angenrheidiol hwn mewn polisi. Er fy mod yn gwerthfawrogi’r amgylchiadau digynsail sydd wedi arwain at y ffaith bod yr holl arholiadau wedi’u canslo eleni, yn anffodus fe wnaeth y dull a ddefnyddiwyd i ddatrys y cyfyng gyngor hwn achosi pryder yn ogystal ag arwain at oblygiadau difrifol iawn o ran dyfodol ein myfyrwyr gan eu digalonni’n llwyr.

"Mae’n amlwg na ellid caniatáu i bolisi Llywodraeth Cymru barhau. Roedd sawl pennaeth lleol wedi cysylltu â’m swyddfa i dynnu sylw at eu pryderon - pryderon dilys iawn – a bod y system wedi gosod myfyrwyr sy’n cyflawni orau mewn ysgolion sy’n cyflawni isaf yn hanesyddol gan eu rhoi dan anfantais.

"Bydd y broses o ddyfarnu graddau a ragfynegwyd gan athrawon yn mynd ymhell tuag at roi hwb i ysbryd y myfyrwyr, a bydd yn dangos bod gan bawb hyder yng ngweithwyr proffesiynol y byd addysg a luniodd y marciau hyn gyntaf, sy’n seiliedig ar dystiolaeth ystafell ddosbarth o’r llynedd.

"Fodd bynnag, mae’n peri tristwch i mi, bod y newid wedi dod yn rhy hwyr i rai disgyblion. Mae rhiant eisoes wedi rhoi gwybod i mi fod ei blentyn wedi colli lle i astudio meddygaeth, oherwydd doedd ganddo fo ddim y graddau gofynnol ddydd Iau diwethaf, ac erbyn heddiw mae’r graddau hynny ganddo."

DIWEDD