Heddiw (26 Hydref) mae Janet Finch-Saunders AS – Aelod o’r Senedd dros Aberconwy – wedi beirniadu Llywodraeth Cymru am y dryswch sy’n wynebu trigolion a pherchnogion busnesau, ar ôl cyhoeddi canllawiau ar wahardd gwerthu eitemau nad ydynt yn hanfodol mewn archfarchnadoedd gydol y clo cenedlaethol 17 diwrnod. Mae manwerthwyr wedi dweud eu bod mewn “sefyllfa anodd” heb restr ddiffiniedig.

Daw’r ymyrraeth yn sgil ei datganiad fel Cadeirydd y Grŵp Trawsbleidiol ar Siopau Bach yr wythnos diwethaf a oedd yn beirniadu cyhoeddiad y polisi lai na thri deg chwe awr cyn dechrau’r cyfnod atal byr. Mae ei swyddfa wedi gweld cynnydd sylweddol mewn negeseuon gan drigolion lleol dros y penwythnos, oll yn datgan eu sioc a’u phryderon am gamau Llywodraeth Cymru.

Gan roi sylwadau, dywedodd Janet:

“Mae’r cyfathrebu gwarthus yn parhau, gan nad yw busnesau fawr callach ynghylch pa eitemau y gallant eu gwerthu, gan achosi cynnwrf mewn ciwiau mewn siopau a rhoi gweithwyr allweddol rheng flaen mewn perygl. Fel mae fy etholwyr wedi ei nodi’n glir, gall rhywbeth nad yw’n hanfodol i un person fod yn hanfodol iawn i un arall.

“Mae hyd yn oed rhai o gyfreithwyr trwyddededig disgleiriaf ein gwlad wedi mynegi eu pryderon, gan labelu’r canllawiau hyn yn flêr ac yn ddryslyd. Bydd cyhoeddiad heddiw, y bydd siopau’n cael y pwerau i weithredu yn ôl eu disgresiwn, yn gwneud dim mwy na drysu’r sefyllfa ymhellach.

“Mae fel nad yw Llywodraeth Cymru wedi dysgu dim o’u camgymeriadau cynharach, gan fwrw iddi unwaith eto heb ystyried y pryderon sydd wedi’u nodi gan Aelodau’r Senedd. Y cwbl y bydd y ffars ddiweddaraf yn ei wneud fydd erydu ymhellach ffydd y cyhoedd yn y weinyddiaeth hon.

“Dros y penwythnos, rydw i wedi derbyn cannoedd o negeseuon e-bost gan etholwyr pryderus a blin sy’n poeni go iawn y bydd y dryswch hwn yn arwain at drigolion bregus heb fodd o gael y bwyd sydd ei angen arnyn nhw. Rwy’n erfyn ar y Prif Weinidog i wrando ar fy mhreswylwyr ac ailystyried gorymateb hurt y wladwriaeth.”

DIWEDD