Heddiw (08 Hydref), mae'r Aelod o'r Senedd dros Aberconwy – Janet Finch-Saunders AS – wedi annog Llywodraeth Cymru i edrych o'r newydd ar nifer y ffigurau coronafeirws lleol fel y gellid mynd ati i gyflwyno unrhyw gyfyngiadau mewn ffordd fwy 'cymesur'. 

Pwysodd yr Aelod am gymorth ariannol tecach i fusnesau'r rhanbarth hefyd, sy'n dal i deimlo ergyd y cyfyngiadau a ddaeth i rym am 18:00 ddydd Iau 1 Hydref 2020. Daeth araith Mrs Finch-Saunders yn ystod cwestiynau i Weinidog Cymru dros yr Economi, Trafnidiaeth a Gogledd Cymru ddoe. 

Wrth sôn am ei haraith i'r Senedd, dywedodd Janet: 

“Mae camau gweithredu anghymesur Llywodraeth Cymru yn cael effaith ddinistriol ar fy etholwyr a busnesau ledled Aberconwy. Dim ond dau fis mae sector twristiaeth y Gogledd wedi ei gael i fasnachu'n iawn i'w cadw nhw i fynd drwy fisoedd anodd y gaeaf. 

“Mae'n ofnadwy bod brenhines trefi gwyliau Cymru fel rhyw dref anghyfannedd unwaith eto fel yr oedd yn ystod y cyfyngiadau symud, tra bod gwestywyr lleol a'r sector manwerthu yn dal i fod yn ddryslyd ac yn ddig ynghylch y bygythiad i'w bywoliaeth.

“Dyna pam rwyf wedi galw am adolygiad brys o'r penderfyniad hwn i osod cyfyngiadau symud ar Sir Conwy. Mae cronfa cyfyngiadau symud newydd Llywodraeth Cymru yn cynnig ceiniogau o gymharu â'r hyn sydd ei angen i sicrhau nad yw fy etholwyr yn colli eu bywoliaeth. Rhaid darparu cyfle teg i oroesi drwy gymorth ariannol.

“Yn gynharach yr wythnos hon, roedd gan y Prif Weinidog yr hyfdra i awgrymu ein bod ni, fel gwleidyddion etholedig sy’n codi pryderon dilys ar ran ein hetholwyr, yn awgrymu y dylai pobl dorri'r rheolau. Mae llawer o'm hetholwyr yn teimlo bod yr awgrym hwn yn hurt ac yn gwbl sarhaus.

“Afraid dweud y byddaf yn rhoi blaenoriaeth i ddiogelwch y cyhoedd bob amser. Ond rhaid i unrhyw gyfyngiadau a gyflwynir barhau i fod yn gymesur â'r bygythiad a wynebir. Dyna pam mae'r Ceidwadwyr Cymreig wedi bod yn galw am gyfyngiadau lleol a arweinir gan ddata sy'n rhoi ystyriaeth briodol i iechyd meddwl cymunedol a chadw swyddi.”

DIWEDD