Mae Janet Finch-Saunders, Gweinidog yr Wrthblaid y Ceidwadwyr Cymreig dros Faterion Gwledig ac Aelod o'r Senedd dros Aberconwy, wedi ysgrifennu at Lywodraeth Cymru i alw am sefydlu Cronfa Datblygu Sioeau Gwledig, fel y gellir darparu cymorth ariannol i sioeau amaethyddol llai.
Wrth danlinellu'r angen am gymorth ariannol, dywedodd Janet:
“Er fy mod yn falch bod cymorth ariannol wedi'i roi i Gymdeithas Amaethyddol Frenhinol Cymru, mae pobl wedi mynegi eu pryder nad yw rhai sioeau gwledig llai wedi cael yr un geiniog o gefnogaeth hyd yma.
“Rydw i'n credu y byddai'n werth i Lywodraeth Cymru greu Cronfa Datblygu Sioeau Gwledig – cynllun a fyddai nid yn unig yn cynorthwyo'r digwyddiadau amaethyddol a chymunedol cyfarwydd hyn i ymdopi â'r cyfnod heriol hwn, ond er mwyn sicrhau eu bod mewn sefyllfa well i ddychwelyd yn gadarn.
“Rydw i wedi cynnig y gallai grantiau fod ar gael i helpu gyda mesurau diogelwch Covid-19 ac ar gyfer arallgyfeirio i raddau mwy. Mae digwyddiadau, fel Sioe Wledig Llanrwst a Sioe Eglwysbach, yn ddiwrnodau pwysig iawn yng nghalendr llawer o drefi a phentrefi gwledig. Byddai cynllun o'r fath yn golygu y bydd y cymunedau hyn yn cael eu grymuso i barhau â'r traddodiadau hyn i'r dyfodol.
Mae'r Aelod wedi galw hefyd am ddatblygu cyfres o ganllawiau gweithredol ar gyfer sioeau amaethyddol, er mwyn helpu i ailddechrau digwyddiadau awyr agored o'r fath wedi'u rheoli yn ddiweddarach eleni. O ran ei chynigion eraill, sydd â'r nod o sicrhau dyfodol mwy disglair i sioeau o'r fath, ychwanegodd Janet:
“Gan edrych tua'r blynyddoedd i ddod, rydw i wedi cynnig hefyd fod 'Llwybr Sioeau Amaethyddol i Gymru' yn cael ei greu– lle byddai'r Gweinidog yn cydweithio â Croeso Cymru er mwyn annog y farchnad ddomestig a rhyngwladol i fynychu'r digwyddiadau hyn lle gellir dysgu cymaint am ffermio, bwyd a chrefftau.
“Pan fydd yr amser yn iawn, bydd cyfleoedd di-ben-draw i'r sioeau hyn ddenu cynulleidfaoedd o bob rhan o'r DU, a thu hwnt. Bydd sicrhau gwariant ganddyn nhw'n golygu y bydd yna fuddsoddiad yn ein cymunedau gwledig, a dylai arddangos sgiliau cynaliadwy helpu hefyd yn ein brwydr yn erbyn y newid yn yr hinsawdd.
“Ond er mwyn i hyn fod yn effeithiol, mae'n rhaid i'r gwaith gynllunio ddechrau o ddifrif. A dyma'r union reswm pam rydw i wedi ysgrifennu at y Gweinidog i ofyn i'w hadran weithio i ddatblygu cyfres o ganllawiau gweithredol ar gyfer sioeau amaethyddol ac i gydweithio â Croeso Cymru ar gynllun marchnata effeithiol.”
Diwedd
Llun: Janet Finch-Saunders AS yn Sioe Eglwysbach 2018