Heddiw (02 Rhagfyr), mae Janet Finch-Saunders AS – Aelod o’r Senedd dros Aberconwy – wedi croesawu diweddariad i’w hymgyrch hirhoedlog i wella diogelwch ffyrdd yng Nglan Conwy, gyda’r newyddion bod yr Asiant Cefnffyrdd wedi cael cyfarwyddiadau i ddatblygu cynllun sy’n addasu rhywfaint o’r baeau parcio cyfagos i wella gallu gyrwyr i weld ymlaen.
Ers ei gohebiaeth ddiwethaf gyda swyddogion am y pryderon, mae arwyddion ychwanegol dros dro wedi’u gosod wrth agosáu at y groesfan. Yn sgil deisebu parhaus yr Aelod i wella diogelwch ffyrdd yn yr ardal, mae swyddogion Llywodraeth Cymru a chynrychiolwyr yr Asiantaeth Cefnffyrdd wedi cyfarfod yn y groesfan i drafod opsiynau i wella’r cyfleuster.
Yn rhoi sylwadau ar y diweddariad, dywedodd Janet:
“Yn sgil pryderon a godwyd gennyf am ddiogelwch y groesfan sebra yng Nglan Conwy, roeddwn i’n falch iawn o gyflwyno sylwadau brys i Lywodraeth Cymru a arweiniodd ar gyflwyno arwyddion dros dro. Pan gyhoeddwyd y mesur dros dro hwn, gofynnais am asesiad gwelededd hanfodol hefyd i weld pa gamau pellach y gellid eu cymryd i sicrhau diogelwch ffyrdd yn yr hirdymor.
“Da yw clywed, yn sgil fy nghamau, bod Llywodraeth Cymru wedi rhoi cyfarwyddyd i’r Asiant Cefnffyrdd ddatblygu cynllun sy’n addasu rhywfaint ar y baeau parcio cyfagos er mwyn gwella gallu pobl i weld ymlaen at y groesfan. Ar ôl i’r cynllun gael ei gwblhau, bydd swyddogion yn gallu ystyried manteision y gwelliant hwn a phennu a ddylid cyflwyno’r newid hwn.
“Mae diogelwch ffyrdd yn achos pryder i bob un ohonom sy’n byw yn lleol. Gyda hyn mewn golwg, ac yn debyg iawn i’r pryderon am groesfan Glan Conwy, byddaf hefyd yn cynnal ymweliad safle gyda swyddogion yr awdurdod lleol i Heol y Frenhines yng Nghraig-y-Don yn hwyrach yn y mis. Yn sgil ymgyrch lwyddiannus i gynyddu buddsoddiad yn y man chwarae lleol, mae’r broblem draffig barhaus yn risg go iawn i ddiogelwch plant ifanc lleol.
“Rwyf wedi ymrwymo i ddod o hyd i ddatrysiadau synhwyrol a fydd o fudd i ddefnyddwyr ffyrdd a cherddwyr. Mae’r llwyddiant diweddar hwn yn dangos grym ymgyrchoedd lleol, gan sicrhau bod lleisiau a phryderon preswylwyr yn cael eu clywed gan y weinyddiaeth ym Mae Caerdydd. Rwy’n gwerthfawrogi’n fawr amynedd a chefnogaeth preswylwyr Glan Conwy i’m ngwaith yn deisebu dros y gwelliannau ffyrdd lleol hanfodol hyn ac yn annog unrhyw un sy’n poeni am ddiogelwch ffyrdd i gysylltu â’m swyddfa ar unwaith.”
DIWEDD
Nodiadau i Olygyddion: