Heddiw (11 Tachwedd), defnyddiodd Janet Finch-Saunders AS - Aelod o’r Senedd Aberconwy - gwestiwn i Weinidog yr Economi, Trafnidiaeth a Gogledd Cymru er mwyn annog Llywodraeth Cymru i fynd ati i ddarparu cymorth wedi’i dargedu ar gyfer diwydiannau twristiaeth a lletygarwch y Gogledd. Mae llawer o fusnesau lleol yn wynebu cwymp yn eu graddfa feddiannaeth yn dilyn y cyfyngiadau symud yn Lloegr.

Gan roi ei sylwadau, dywedodd Janet:

“Fel y mae fy sgyrsiau â pherchnogion busnes lleol wedi’i ddangos yn glir, mae busnesau llety ledled Aberconwy yn troedio’n agos i’r dibyn. Mewn ambell achos, mae’r raddfa feddiannaeth wedi disgyn i sero gan fod 80% o’u cwsmeriaid yn teithio o Loegr.

“O gofio bod Conwy eisoes wedi bod dan gyfyngiadau lleol cyn y cyhoeddiad am y cyfnod atal byr, y realiti yw na fydd rhai busnesau yn Aberconwy wedi gallu masnachu ers 8 wythnos erbyn diwedd cyfyngiadau Lloegr.

“Gyda’r argyfwng economaidd rhanbarthol hwn mewn golwg, rwyf wedi galw ar Weinidog yr Economi i fynd ati ar unwaith i ddarparu grantiau ariannol i gefnogi busnesau twristiaeth sydd wedi gweld gostyngiad yn eu cwsmeriaid y mis hwn. Rwyf wedi bod ysgrifennu ac yn gofyn am  sefydlu cymorth wedi’i dargedu o’r fath ers y cyfnod clo cyntaf, yn gynharach eleni. 

“Rwy’n gobeithio ei fod yn rhannu fy mhryderon ynghylch canfyddiadau arolwg Twristiaeth Gogledd Cymru yn ddiweddar nad oedd 75% o ymatebwyr wedi llwyddo i gyflwyno cais i gynllun Cam 3 Cronfa Cadernid Economaidd Llywodraeth Cymru, cyn iddi gau yn gynt na’r bwriad. Dyw hyn ddim yn ddigon da.

“Rwyf wedi gofyn am esboniad ynghylch faint o gyllid sydd ar ôl o’r gyllideb wedi’i chlustnodi o £20 miliwn a gafodd ei haddo i gefnogi busnesau twristiaeth a lletygarwch, fel rhan o’r trydydd cam. Mae busnesau’r Gogledd angen atebion ar unwaith, ynghyd ag eglurder ar sut y byddan nhw’n cael eu cefnogi i bontio’r cyfnod hwn.” 

DIWEDD