Mae Janet Finch-Saunders MS – Aelod o’r Senedd dros Aberconwy – wedi pwyso ar y Prif Weinidog heddiw (24 Mehefin) i roi mwy o gymorth i'r busnesau lletygarwch hynny nad ydynt yn gallu ailagor i gwsmeriaid ar 13 Gorffennaf.

Daw ei chais ar adeg bryderus i sector lletygarwch Cymru. Mae ffigurau diweddar a ryddhawyd gan Twristiaeth Gogledd Cymru wedi awgrymu y gall 10,500 o swyddi ar draws y rhanbarth ddiflannu o ganlyniad i'r cyfyngiadau a osodwyd yn ystod pandemig COVID-19.

Wrth siarad ar ôl ei chyfraniad i'r cyfarfod llawn rhithwir, dywedodd Janet:

“Er fy mod i'n croesawu'r ffaith bod Mark Drakeford wedi gwrando ar alwadau'r Ceidwadwyr Cymreig i ailagor economi ein gwlad, mae cryn ddryswch ymysg llawer o fusnesau lletygarwch lleol oherwydd natur annelwig a phrin argymhellion Llywodraeth Cymru.

“Mae angen mwy o arweiniad ar westai a llety hunangynhwysol ar sut y gallant ailagor yn ddiogel, er mwyn rhoi hyder i staff a chwsmeriaid. Mae parciau teithiol a safleoedd gwersylla sydd â chyfleusterau a rennir yn gofyn am fwy o eglurder hefyd ynghylch a allant ailagor yn hwyrach yn y tymor.

“Mae ein safleoedd teithio a gwersylla yn ganolog i economi'r Gogledd, gan ddarparu gwyliau rhesymol sy'n caniatáu i deuluoedd cyfan fwynhau ac ailgysylltu â’n rhanbarth ysblennydd. Ond maen nhw’n fregus hefyd ac yn dibynnu’n fawr ar dymor yr haf yn aml.

“Rhaid i Lywodraeth Cymru roi mwy o eglurder i'r busnesau sy'n creu cyfleoedd gwaith hanfodol, ac amlinellu pa gymorth ariannol pellach y gallant ei gynnig i'n safleoedd teithiol a gwersylla pe baent yn cael eu hatal rhag ailagor yr haf hwn.”

DIWEDD