Heddiw (08 Hydref) mae Janet Finch-Saunders AS - yr Aelod o'r Senedd dros Aberconwy – wedi galw ar Lywodraeth Cymru i ddarparu eglurder ar frys ynghylch ei Chronfa i Fusnesau dan Gyfyngiadau Lleol. Mae'r Gronfa’n addo £1,500 i fusnesau manwerthu, hamdden a lletygarwch cymwys yng Nghymru sy'n gweithredu mewn eiddo â gwerth trethadwy o rhwng £12,001 a £51,000, a £1,000 i fusnesau cymwys sydd â gwerth trethadwy o £12,000 neu lai.

Fodd bynnag, mae'r manylion yn dal i fod yn brin, gyda dryswch ynghylch pryd y caiff yr arian hwn ei ddosbarthu. Yn ystod araith i'r Senedd ddoe, pwysodd Mrs Finch-Saunders am gymorth ariannol tecach i fusnesau'r rhanbarth sy'n dal i deimlo ergyd y cyfyngiadau a ddaeth i rym am 18:00 ddydd Iau 1 Hydref 2020.

Wrth sôn am hyn, dywedodd Janet: 

“Fel y dywedais wrth Weinidog yr Economi, Trafnidiaeth a Gogledd Cymru yn y Senedd yr wythnos hon: mae angen cymorth ariannol tecach ar fusnesau Aberconwy fel mater o frys. Felly, mae'n siomedig nad yw manylion am ddosbarthu’r Gronfa i Fusnesau dan Gyfyngiadau Lleol wedi'u cyhoeddi hyd yma. 

“Yn hytrach na bod yn Ymateb Cyflym, rhaid ateb cwestiynau brys ynghylch pam nad yw'r cynllun hwn yn dosbarthu'r arian angenrheidiol yn barod, o ystyried bod y system Ardrethi Annomestig wedi'i defnyddio eisoes ar gyfer proses grant debyg yn gynharach eleni.

“Rhaid i Weinidog Cymru dros yr Economi adolygu'r penderfyniad i ddeddfu cap gwerth trethadwy o £51,000 hefyd. Wedi'r cyfan, mae gan Landudno amryw o westai a fydd yn cael eu heithrio o'r cymorth ariannol hanfodol hwn os na chaiff y cap ei ddileu.

“Llywodraeth Cymru sy'n gyfrifol am wthio ein hardal i’r argyfwng economaidd hwn yn sgil y cyfnod clo, felly mae angen iddynt fynd ati i gynnig y cymorth ariannol angenrheidiol a fyddai'n caniatáu i fusnesau lleol oroesi a phontio drwy'r cyfnod hwn."

DIWEDD