Mae Janet Finch-Saunders, yr Aelod o'r Senedd dros Aberconwy, wedi egluro'r angen i sbarduno twf economaidd ar ôl Brexit drwy annog Llywodraeth Cymru i gefnogi Caergybi fel y dewis blaenllaw i fod yn Borthladd Rhydd yng Nghymru. Daeth yr alwad mewn cwestiynau a ofynnwyd i'r Cwnsler Cyffredinol.
Wrth egluro'r manteision, dywedodd Janet:
“O Gynllun Gweithredu Diwedd y Cyfnod Pontio 2020, mae'n amlwg bod awdurdodau lleol Cymru wedi bod yn cydweithio â Llywodraeth Cymru i ystyried anghenion porthladdoedd unigol. Rydw i bellach yn gofyn i Weinidogion gydweithredu ymhellach â rhanddeiliaid y rhanbarth i gefnogi cynnig Caergybi i fod y dewis blaenllaw i fod yn Borthladd Rhydd yng Nghymru.
“Ni ellir tanbwysleisio manteision clir a pharhaol y cais hwn. Yn wir, fel yr unig gais yng Nghymru i gynnwys Prifysgol, mae gan y Porthladd Rhydd hwn y potensial i ddenu llu o gyflogwyr newydd mawr, gan ddod â chyflogaeth barhaol a rhoi hwb i'r gadwyn gyflenwi ar draws y rhanbarth cyfan.
“Dylid manteisio ar y cyfle i sicrhau bod y cynllun hwn yn cael ei weithredu a hyn ar y cyd â'r newyddion da bod Llywodraeth y DU yn rhoi hwb i Fargen Twf Gogledd Cymru. Mae'r Canghellor wedi cyhoeddi y bydd y Fargen yn derbyn £4.4 miliwn yn ychwanegol y flwyddyn o 2021/22 am y naw mlynedd sy'n weddill - newyddion gwych sy'n tanlinellu sut mae cydweithredu â San Steffan yn gwneud Cymru'n gryfach.
“Gyda'i gilydd, mae'n amlwg bod momentwm gwirioneddol gan y gefnogaeth ar draws y Gogledd i'r rôl gadarnhaol y gall porthladd rhydd ei gael wrth adfer yn economaidd ar ôl Covid."
Diwedd
Llun: Janet Finch-Saunders AS