Mewn newyddion cadarnhaol i'r gymuned leol, mae Janet Finch-Saunders, yr Aelod o'r Senedd dros Aberconwy, wedi croesawu'r newyddion bod Cymru wedi mynd heibio'r garreg filltir o roi dos cyntaf y brechlyn i filiwn o bobl, gyda rhanbarth BIPBC wedi rhoi cyfanswm o 271,037 o ddosau erbyn 7 Mawrth 2021.  

Gyda'r ymdrech frechu yn mynd rhagddi yn llawn egni a bwrlwm, aeth Mrs Finch-Saunders ati unwaith eto ddoe i annog Llywodraeth Cymru i ddarparu map ffordd ar gyfer dod allan o'r cyfyngiadau symud fel y gall busnesau lleol ddechrau'r paratoadau angenrheidiol.

Wrth ddathlu'r ymdrech frechu leol, dywedodd Janet: 

“Bydd y newyddion bod yr ymdrech frechu leol yn parhau i fwrw ymlaen yn newyddion y bydd trigolion ar hyd a lled Aberconwy yn ei groesawu, ac mae'r diolch am hynny i ymdrech arwrol ein gweithwyr iechyd a gofal cymdeithasol lleol, y gwirfoddolwyr a'r lluoedd arfog. Fel yr wyf wedi dweud o'r blaen, maen nhw'n glod i'w proffesiwn a diolchaf i bob un ohonyn nhw. 

“Mae'r wybodaeth ddiweddaraf gan Fwrdd Iechyd Prifysgol Betsi Cadwaladr wedi nodi'n glir fod y Bwrdd bellach wedi rhoi dos cyntaf o'r brechlyn COVID-19 i 84% o bobl 65-69 oed a bron i draean o bobl 16-65 oed sydd â chyflyrau iechyd isorweddol. Mae hyn yn newyddion gwych sy'n eithriadol o fuddiol yn ein hymdrech i gael map ffordd ar gyfer ailagor. 

“Yn hollbwysig, gyda'r rhaglen frechu ledled y DU yn parhau i fynd rhagddi'n llawn egni a bwrlwm, mae Bwrdd Iechyd Prifysgol Betsi Cadwaladr yn disgwyl gweld cynnydd sylweddol yn y cyflenwad o frechlyn AstraZeneca, gan gyflymu'r broses o gyflwyno'r brechlyn ar draws eu rhwydwaith o bartneriaid gofal sylfaenol. Mae hyn yn brawf pellach eto bod Cymru'n gryfach pan fyddwn ni'n gweithio ar y cyd â'n partneriaid yn y DU.  

“Mae'r broses hon o gyflwyno'r brechlyn yn arwydd clir bod Aberconwy yn daer dros gael dychwelyd yn gryfach."

Diwedd