Yn dilyn sylwadau a wnaed gan Janet Finch-Saunders, Aelod o'r Senedd dros Aberconwy, mae Llywodraeth Cymru wedi cadarnhau y bydd yn trefnu i gynnal asesiad ar gyfer croesfan i gerddwyr yn Llwyn Brith yn y flwyddyn ariannol nesaf. Cadarnhawyd y newyddion cadarnhaol mewn llythyr diweddar gan Lee Waters, AS, y Dirprwy Weinidog Trafnidiaeth.

Wrth drafod y cynnydd, dywedodd Janet:  

“Ar ôl gweithio ar y mater difrifol hwn yn ymwneud â diogelwch ar y ffyrdd drwy gydol y tymor hwn o'r Senedd, rydw i'n falch iawn o fod wedi cael y wybodaeth gadarnhaol ddiweddaraf gan Lywodraeth Cymru am y cynnydd sy'n cael ei wneud yn y mater. Roedd hyn yn hollbwysig gan fod y mater hwn yn parhau i beri cryn bryder i breswylwyr ar ddwy ochr yr A470, sy'n wynebu'r her o groesi'r briffordd hon yn ddiogel.  

“I drigolion Parc yr Eryr, Llwyn Brith a Maes Melwr sy'n defnyddio gwasanaethau bws, y plant lleol neu'r rhai sy'n agored i niwed sydd am gerdded i'r dref neu'r ysgol, mae'n rhaid iddyn nhw groesi'r A470 yn rheolaidd. Mae'n fater sy'n peri cryn bryder o ran diogelwch i bob defnyddiwr ffordd, yn enwedig yr adeg hon o'r flwyddyn pan nad yw mor hawdd i yrwyr weld yn glir.

“Mae'r Dirprwy Weinidog wedi cadarnhau y bydd asesiad yn cael ei gynnal yn y flwyddyn ariannol nesaf er mwyn disodli'r groesfan sydd heb ei rheoli gan osod croesfan i gerddwyr yn lle hynny. Mae'n galonogol clywed y bydd astudiaethau achos lleol yn cael eu cynnwys yn yr asesiad hwn er mwyn pwysleisio'r angen amdano. 

“Wrth i'r ymgyrch hollbwysig hwn dros newid barhau, byddaf yn ceisio sicrhau bod Llywodraeth Cymru'n parhau â'r ymrwymiad hwn. Gan weithio mewn cydweithrediad â'r gymuned leol, rydw i wedi ymrwymo i ddod o hyd i atebion synhwyrol sydd o fudd i ddefnyddwyr ffyrdd a cherddwyr, gan ddiogelu ein plant a phobl sy'n agored i niwed.” 

Diwedd 

Nodiadau i Olygyddion:  

• Mae copi o ateb Llywodraeth Cymru ynghlwm.