Heddiw (07 Rhagfyr), mae Gweinidog yr Wrthblaid y Ceidwadwyr Cymreig dros Newid yn yr Hinsawdd, Ynni a Materion Gwledig – Janet Finch-Saunders AS – wedi croesawu treial o gynllun dychwelyd ernes (DRS) newydd ym Mwrdeistref Sirol Conwy, gan ei bod yn annog Llywodraeth Cymru i gynyddu eu huchelgais i gyrraedd targedau ailgylchu.
Cyn hir, bydd trigolion Colwyn Heights yn cymryd rhan mewn cynllun peilot ar gyfer dull digidol newydd o olrhain ailgylchu, gan helpu Cymru ar drywydd economi gylchol, ddiwastraff. Bydd y treial pedair wythnos yn cynnwys nifer o gartrefi yn yr ardal, ac yn dechrau yn y gwanwyn. Bydd aelwydydd yn cael set o boteli wedi'u tagio gan Polytag, ac yn defnyddio ap am ddim i'w sganio wrth eu rhoi yn y bocsys ailgylchu.
Bydd y poteli hefyd yn cael eu sganio-wrth-gasglu gan dîm ailgylchu gwastraff cartref Cyngor Bwrdeistref Sirol Conwy. Ar gyfer pob potel sy'n cael ei sganio ar y naill ben a'r llall i'r broses DRS, bydd aelwydydd yn derbyn tocyn digidol gwerth 20c yr un. Bydd y tocynnau wedyn yn cael eu cyfrannu at ymgyrch codi arian Ysgol Pen y Bryn, yr ysgol gynradd leol.
Meddai Janet:
“Lai na phythefnos yn ôl, agorais ddadl yn siambr y Senedd yn galw am gyflwyno cynllun dychwelyd ernes yn ddi-oed yma yng Nghymru. Mae'r Ceidwadwyr Cymreig wedi bod yn galw am weithredu system o'r fath ers 2016, wedi'i hysbrydoli gan gynlluniau tebyg ledled y byd.
“Rwy'n falch dros ben bod Sir Conwy wedi'i dewis ar gyfer y treial DRS arloesol hwn, sy'n brawf o waith caled yr awdurdod lleol a'i swyddogion gwastraff a'r amgylchedd. Mae'r treial hwn yn pwysleisio'r ffaith fod y dechnoleg yn bodoli i’w gwneud yn bosib cyflwyno DRS yn gyflym ond hefyd mewn ffordd gyfleus i ddefnyddwyr ac awdurdodau lleol.
“Mae'r treial hwn yn gam cyntaf pwysig. Er hynny, alla i ddim credu bod y broses wedi cymryd cyhyd i gyrraedd y pwynt hwn. Wrth gydnabod mai cynwysyddion diodydd yw tua 40% o sbwriel ein gwlad, mae'n hollbwysig bod Llywodraeth Cymru yn gwella’i hymateb i'r holl wastraff plastig sy'n bla.
“Mae'n hanfodol bod unrhyw dreialon dilynol neu debyg yn cael eu cyflwyno'n gyflym ledled Cymru, wrth i ni bwyso am gamau gweithredu dros economi gylchol. Rhaid i uchelgais Llywodraeth Cymru adlewyrchu awydd y cyhoedd am newid. Dyw mynd dow-dow fel sy’n digwydd ar hyn o bryd ddim yn opsiwn ymarferol bellach.
DIWEDD
Nodiadau i olygyddion:
- I gael rhagor o wybodaeth am y treial, a sut bydd y cynllun yn gweithio, cliciwch yma.
- Cwmni o Lannau Dyfrdwy yw Polytag – am ragor o fanylion, cliciwch yma.