Yr wythnos hon, methodd y Gweinidog Iechyd a Gwasanaethau Cymdeithasol â mynd i’r afael â galwadau brys i adolygu a diwygio’r Adran Damweiniau ac Achosion Brys yn Ysbyty Glan Clwyd. Cyflwynwyd y cais am adolygiad gan Janet Finch-Saunders, Gweinidog yr Wrthblaid dros Ofal Cymdeithasol, wrth iddi nodi mai Adran Damweiniau ac Achosion Brys Ysbyty Glan Clwyd sy’n perfformio waethaf yng Nghymru. Dro ar ôl tro, mae’r adran hon wedi methu â chyrraedd y targed i 95 y cant o gleifion gael eu gweld o fewn pedair awr.

Hefyd, roedd perfformiad y Bwrdd Iechyd ar amseroedd aros 12 awr yn waeth nag unrhyw le arall yng Nghymru, gyda dim ond 81.9 y cant o gleifion yn cael eu gweld o fewn y targed ym mis Tachwedd 2019.

Meddai Janet ar ôl holi’r Gweinidog:

“Mae adrannau Damweiniau ac Achosion Brys wedi bod yn dirywio ledled Cymru ers degawd, gyda chanran y cleifion sy’n cael eu gweld o fewn yr amser targed o bedair awr yn disgyn o 90.9 y cant ym mis Hydref 2009 i 74.4 y cant ym mis Tachwedd 2019.

“Fel yr eglurais i’r Gweinidog, mae’r sefyllfa ar ei gwaethaf ym Mwrdd Iechyd Prifysgol Betsi Cadwaladr, lle mae’r ganran gyffredinol wedi disgyn o 93.7 y cant ym mis Hydref 2009 i 72.2 y cant fis Tachwedd diwethaf.

“Mae’r sefyllfa hyd yn oed yn waeth ym mhob un o brif adrannau Damweiniau ac Achosion Brys y bwrdd, gydag Ysbyty Gwynedd yn gweld dim ond 69.9 y cant o gleifion o fewn y targed, Ysbyty Maelor Wrecsam yn gweld 62.5 y cant, a Glan Clwyd yn gweld 57.5 y cant.

“Rwy’n sylweddoli bod adrannau brys o dan bwysau mawr yr adeg hon o’r flwyddyn, ac yn nodi sylw’r Gweinidog y bu ymyrraeth allanol yn ystod y gaeaf diwethaf ac eleni, ond mae’n amlwg nad yw hyn yn ddigon.

“Mae angen rhagor o gymorth ar ein hysbyty.

“Dro ar ôl tro dros y degawd diwethaf, mae Ysbyty Glan Clwyd wedi methu â chyrraedd y targed i weld 95 y cant o gleifion o fewn yr amser targed o bedair awr. O ganlyniad, mae’n rhaid gofyn faint yn rhagor o gleifion fydd yn gorfod wynebu cyfnodau hir o aros cyn i’r Gweinidog gytuno i adolygu a diwygio’r adran?”

Nodiadau:

Questions to the Minister for Health and Social Services: Accident and Emergency Waiting Times

Perfformiad yn erbyn y targed o bedair awr o ran amseroedd aros yn ôl ysbyty

Perfformiad yn erbyn y targed o 12 awr o ran amseroedd aros yn ôl ysbyty