Fel rhan o'i hymgyrch hirhoedlog ar broblemau llifogydd lleol, mae Janet Finch-Saunders AS – Aelod o'r Senedd dros Aberconwy – heddiw (28 Ionawr) wedi croesawu cynigion pellach i leihau gollyngiadau dŵr o Lyn Eigiau, yn sgil diweddariad gan RWE Innogy.

Ar hyn o bryd mae RWE yn cynnal astudiaeth i ddeall hyfywedd y cynnig i gynyddu capasiti Llyn Eigiau. Ers eu diweddariad diwethaf, mae'r cwmni wedi rhagweld effeithiau'r mesurau gwahanol y gellir eu gweithredu, gan gynnwys cynyddu capasiti llif y twnnel o Eigiau i Cowlyd. Mae'r model yn dangos y gallai hyn leihau'r gollyngiad cyfartalog gan hanner.

Wrth sôn, dywedodd Janet:

“Diolch i gydweithrediad parhaus RWE Innogy, mae camau breision yn cael eu cymryd i ganfod ateb effeithlon a chostffeithiol i leihau'r cyfraddau dŵr sy'n gollwng o Lyn Eigiau. Rwy'n gwybod y bydd trigolion ledled Dyffryn Conwy yn croesawu'r newyddion rhagorol hwn.

“Mae modelu dadansoddi RWE wedi cyhoeddi rhai canlyniadau annisgwyl ond calonogol, a bydd y cwmni'n ceisio eu cadarnhau nawr gyda phrofion safle a thrwy gasglu data pellach. Mae hyn yn hanfodol gan mai diogelwch y cyhoedd yw'r brif flaenoriaeth i bawb.

“Rwy'n gwerthfawrogi amynedd trigolion yn fawr, wrth i mi barhau i annog rhanddeiliaid i wneud gwaith a fydd yn lliniaru problemau llifogydd hirsefydlog. Mae'r diweddariad hwn yn brawf pellach o sut gall camau gweithredu gan grwpiau lleol ymroddedig, megis ein cyfarfodydd yng Ngwesty'r Eryrod Llanrwst, arwain at gamau blaengar ymlaen sy'n diogelu tiroedd a chartrefi.

“Ochr yn ochr â'r cyfarfodydd hyn, rwyf hefyd wedi cyflwyno fy nghynllun trawsnewidiol i Lywodraeth Cymru er mwyn diogelu cymunedau rhag llifogydd. Mae Cymru yng nghanol argyfwng llifogydd, felly byddai'r cynllun hwn yn cyflwyno asiantaeth benodol a fyddai’n canolbwyntio’n unswydd ac 100% ar y mater, yn hytrach na'r trefniant presennol lle mae gan 300 o swyddogion CNC rywfaint o gyfrifoldeb ar y mater.”

DIWEDD

Llun: Cyfarfod cyhoeddus yn Llanrwst fis Chwefror 2020 - cyn cyfyngiadau’r Coronafeirws