Heddiw (29 Mehefin), soniodd Janet Finch-Saunders AS – Aelod o’r Senedd dros Aberconwy – am ei llythyr at Brif Weithredwr Tesco, lle’r oedd yn galw ar y cwmni i lansio ymgyrch addysg flaenllaw yn y diwydiant sy'n tynnu sylw at aflwydd wyau o ieir mewn cewyll. Mae diwydiant wyau'r DU yn werth biliynau o bunnoedd bob blwyddyn. Roedd Tesco eisoes wedi cyhoeddi y bydd y cwmni'n rhoi'r gorau i brynu wyau o ieir mewn cewyll erbyn 2025. Fodd bynnag, yn ôl RSPCA Assured, mae tua 50% o'r ieir dodwy yn y DU yn dal i gael eu cadw mewn cewyll batri.

Wrth drafod y sefyllfa, meddai Janet:

"Mae fy etholwyr yn llygad eu lle i fod yn siomedig fod archfarchnad Tesco leol wedi dechrau gwerthu mwy a mwy o wyau ieir cewyll. Ers tro byd, derbyniwyd nad yw’r cewyll weiren rhwyllog a ddefnyddir i gadw ieir batri yn rhoi digon o le i grafu’n rhwydd a chlwydo'n gyfforddus, gan arwain yn aml at rwystredigaeth a dioddefaint.

"Rhaid i Tesco roi'r gorau i roi costau uwchlaw lles. Mae eu gweithredoedd yn tanseilio'r camau sylweddol gan ffermwyr lleol i wella'u safonau lles, sy’n aml yn rhoi cyfle i’w ieir grwydro a mwynhau porfeydd agored y Gogledd.

"Fel brand Prydeinig o fri, gyda hanes o addysgu pobl am fwyd, mae Tesco mewn sefyllfa freintiedig i helpu i newid pethau. Rwyf wedi gofyn i'r cwmni ystyried darparu arwyddion clir am darddiad yr wyau hyn.

"Gallai ymgyrch arloesol a chadarnhaol gan Tesco ddarparu adnoddau addysgol pellach i ddefnyddwyr hefyd am wyau cawell sydd wedi'u cuddio mewn bwydydd wedi'u prosesu, fel pasta a chacennau, er mwyn i ddefnyddwyr wneud dewis gwybodus wrth siopa."

DIWEDD

Nodiadau i olygyddion:

• Anfonwyd llythyr Janet at Mr Jason Tarry, Prif Weithredwr Tesco y DU a Gweriniaeth Iwerddon, ar 25/06/2020. Ni dderbyniwyd ymateb swyddogol hyd yn hyn. Mae copi’n atodedig.