Heddiw (13 Chwefror), croesawodd Janet Finch-Saunders AS – yr Aelod o’r Senedd dros Aberconwy - y newyddion y bydd BT yn ysgrifennu at oddeutu 375 cartref neu fusnes ledled yr etholaeth, i egluro y gallant fod yn gymwys i gael cysylltiad band eang cyflymach o dan Rwymedigaeth Gwasanaeth Cyffredinol newydd.

Ers 20 Mawrth 2020, mae pob cartref a busnes yn Aberconwy wedi cael hawl cyfreithiol i ofyn i BT ddarparu band eang ‘addas’ iddynt o dan y Rhwymedigaeth Gwasanaeth Cyffredinol newydd ar gyfer Band Eang. Diffinnir hyn yn y gyfraith fel gwasanaeth gyda chyflymder lawrlwytho o 10Mbps o leiaf a chyflymder lanlwytho o 1Mbps o leiaf.

Mae Ofcom yn amcangyfrif mai dim ond oddeutu 0.5% o bob eiddo yn y DU (tua 167,000) sy’n methu cael mynediad at fand eang addas, o ystyried y band eang cyflym iawn a’r datrysiadau diwifr sydd ar gael yn eang. Y safleoedd hyn sydd ar ôl sy’n gymwys am y Rhwymedigaeth.

Gan roi ei sylwadau ar y sefyllfa yn Aberconwy, dywedodd Janet:

“Gall cysylltiad band eang dibynadwy wneud cyfraniad pwysig at adfywio’r gymuned, yn enwedig wrth i fwy o’n bywydau symud ar-lein. Dengys ystadegau bod 40% o fusnesau gwledig wedi prynu o leiaf hanner eu nwyddau ar-lein yn 2019, gyda 81% o BBaChau gwledig bellach yn rhedeg  gwefan i gynyddu eu masnach.

“Wrth i weithio gartref ddod yn norm nad oes arwydd ei fod yn dod i ben, rwy’n croesawu’r newyddion bod BT bellach yn ysgrifennu at lawer o’m hetholwyr a sawl busnes lleol i egluro y gallant fod yn gymwys i gael cysylltiad band eang cyflymach o dan y Rhwymedigaeth Gwasanaeth Cyffredinol newydd.

“Fodd bynnag, fel mae swyddogion diwydiant wedi dweud yn glir yn ein trafodaethau parhaus ar y mater hwn, mae darparu cysylltedd wedi’i uwchraddio i leoliadau anodd eu cyrraedd yn aml yn her peirianneg sifil fawr gyda chostau uchel. Er hyn, rwy’n parhau wedi ymrwymo i ganfod datrysiad sydd o fudd i bawb.

“Gan gadw hyn mewn cof, rwyf wedi dechrau ar y broses o holi Llywodraeth Cymru am y sgyrsiau y maent yn eu cael gyda’r diwydiant a phartneriaid y Llywodraeth i sicrhau bod y mater hwn yn cael ei ystyried yn drylwyr.” 

DIWEDD

Nodiadau i Olygyddion:  

• Ar hyn o bryd mae BT wrthi’n ysgrifennu’n uniongyrchol at  bob eiddo cymwys i’w hysbysu o’u hawl i wneud cais. Gall unrhyw un wirio eu cymhwyster a chael rhagor o wybodaeth yn www.bt.com/uso 
• I bob eiddo sy’n gymwys am Rwymedigaeth Gwasanaeth Cyffredinol, mae’n ofynnol i BT uwchraddio eu cysylltedd, ar gais, am ddim i’r cwsmer os yw’r gwaith angenrheidiol yn costio £3,400 neu lai. Os yw costau'r eiddo yn parhau dros £3,400, gall y cwsmer ddewis talu’r costau llawn dros ben hyn i ddechrau ar y gwaith angenrheidiol. Mae’r gyfraith yn datgan bod yn rhaid i’r defnyddwyr dalu’r costau dros ben hyn.