Heddiw (28 Gorffennaf), mae Janet Finch-Saunders – Gweinidog Newid Hinsawdd, Ynni a Materion Gwledig yr Wrthblaid y Ceidwadwyr Cymreig – wedi annog lladd-dai ledled Cymru i gyfrannu at astudiaeth hyfywedd ar y sector. Daw ei galwadau ar ôl iddo ddod i’r amlwg y bydd cwmnïau yn elwa ar gyllid cyhoeddus o dan delerau Bil Amaethyddiaeth newydd Llywodraeth y DU.

Nod yr astudiaeth, a gynhelir gan Brifysgol Newcastle a’i chyllido gan Gronfa Cefn Gwlad Tywysog Cymru, yw nodi pa gamau y gellir eu cymryd i helpu i atal lladd-dai llai rhag cau. Daw’r astudiaeth ar ôl i 12 lladd-dy bach gau yn ystod y 18 mis diwethaf.

Wrth siarad am yr astudiaeth, dywedodd Janet:

“Mae’n drist dros ben, er bod y lladd-dai yn mynd ati i geisio lleihau milltiredd bwyd a hybu economïau lleol, mae ei niferoedd wedi gostwng o draean yn ystod y degawd diwethaf. Gyda hyn mewn golwg, rwy’n croesawu’r newyddion y bydd lladd-dai bach yn elwa ar gyllid cyhoeddus o dan delerau Bil Amaethyddiaeth newydd y DU.

“Bydd yr arian hwn yn cefnogi’r sector wrth iddo geisio gwneud y newidiadau angenrheidiol ac amrywiol i amddiffyn ei hyfywedd yn yr hirdymor. Wedi’r cwbl, mae’r cwmnïau hyn yn helpu i gefnogi cynhyrchwyr cig llesiant uchel ein cenedl mewn cyfnod o heriau cystadleuol parhaus.

"Fodd bynnag, mae’n rhaid i benderfyniadau polisi ar ddosbarthu arian fod yn seiliedig ar ddata. Mae’n amlwg y bydd canfyddiadau’r astudiaeth hyfywedd cenedlaethol newydd hon yn cael eu defnyddio i nodi pa gamau y gellir eu cymryd i atal lladd-dai llai rhag cau, a bydd yn dylanwadu ar sut y darperir cymorth yn y blynyddoedd nesaf.

“Rwy’n erfyn ar berchnogion a rheolwyr lladd-dai ledled Cymru i ystyried llenwi’r arolwg dienw hwn er mwyn i’w ganlyniadau cyfanredol lywio polisi yn well ym Mae Caerdydd a thu hwnt. Mae’r dull traws-sector hwn a arweinir gan ddata yn angenrheidiol i ddiogelu dyfodol y sector hwn a diogelu swyddi.”

DIWEDD