Wrth nodi dechrau #Februdairy 2021, mae Janet Finch-Saunders AS – Gweinidog Cysgodol y Ceidwadwyr Cymreig dros Faterion Gwledig – heddiw (01 Chwefror) yn annog trigolion Cymru gyfan i barhau i brynu'n lleol a defnyddio'r mis dathlu i flasu rhai o gynnyrch gorau'r genedl:

“Bu'n ddeuddeg mis eithriadol o anodd i'n ffermwyr llaeth, gyda phwysau digynsail y pandemig a nifer y cynhyrchwyr yng Nghymru yn parhau i ostwng. Yn wir, yn ôl ystadegau'r Asiantaeth Safonau Bwyd, mae fy rhanbarth i, y Gogledd, wedi colli 10 cyflenwr rhwng mis Ebrill 2019 a 2020.

“Mae ymgyrch #Februdairy yn fenter wych sy'n cefnogi ein cymunedau gwledig i'r carn. Mae rôl ffermydd llaeth Cymru fel contractwyr a darparwyr swyddi gwledig yn rhy bwysig i'w hanwybyddu. Ar ôl gweithio mor galed yn ein bwydo gydol y pandemig, mae ond yn iawn ein bod ni'n dechrau rhoi rhywbeth yn ôl.

“Gall annog mwy o bobl i brynu cynnyrch llaeth gael effaith gadarnhaol ar ein hiechyd cyfunol, yn enwedig oherwydd presenoldeb maethynnau fel calsiwm, potasiwm a fitamin D. Dyna pam rwy'n annog pawb i gymryd rhan a chael blas ar ein danteithion llaeth lleol!

“Yn fy etholaeth i, Aberconwy, rydym wedi ein bendithio gan gynnyrch llaeth arbennig o flasus, gan gynnwys iogwrt Llaeth y Llan a chawsiau Hufenfa De Arfon a’r Snowdonia Cheese Company. Felly da chi, gwnewch ymdrech arbennig i flasu'r bwydydd ardderchog hyn, a chefnogi'r diwydiant y mis hwn.”

Llun: Janet Finch-Saunders AS