Heddiw (30 Medi), mae’r Aelod o’r Senedd dros Aberconwy – Janet Finch-Saunders AS – wedi sôn am ei phryder am etholwyr sy’n agored i niwed, yn dilyn cyhoeddi cyfyngiadau symud lleol yn Sir Conwy o 6pm ddydd Iau 1 Hydref 2020. Neithiwr, gofynnodd Mrs Finch-Saunders sawl cwestiwn brys i Weinidog Iechyd Cymru am gymorth i’r henoed a’r rhai sy’n agored i niwed.

Mae eithriadau i’r cyfyngiadau yn cynnwys teithio i’r ysgol neu i weithio os na allwch weithio gartref. Gall pobl deithio i brynu bwyd a chyflenwadau meddygol, ceisio cymorth meddygol neu fynd at y milfeddygon, a symud tŷ.

Wrth sôn am ei phryder, dywedodd Janet:

“Rwy’n ofni’n fawr yr effaith y gallai’r cyfyngiadau diweddaraf hyn ei chael ar rai o’m hetholwyr bregus ac oedrannus, sydd eisoes wedi treulio llawer o’r flwyddyn wedi ynysu oddi wrth eu hanwyliaid.

“Canfu ymchwil a gynhaliwyd gan Age UK yn gynharach eleni fod dros ddau o bob pump o bobl 70 oed a throsodd yn credu bod y Coronafeirws wedi effeithio’n wael ar eu hiechyd meddwl. Mae hyn yn bryder gwirioneddol yn fy etholaeth i, lle mae’r ddemograffeg yn tueddu tuag at etholwyr hŷn.

“Drwy gydol y cyfyngiadau symud blaenorol, gwnaeth Cyngor Bwrdeistref Sirol Conwy waith gwirioneddol ganmoladwy wrth ddarparu rhwydwaith gref o gefnogaeth i’n cymunedau lleol. Ond fe wnaeth hynny gostio i’n hawdurdodau lleol, ac maen nhw’n dal i ddioddef yn sgil diffyg cymorth ariannol wedi’i ddarparu gan Lywodraeth Cymru.

“Felly, rwyf wedi annog Llywodraeth Cymru i ystyried adolygu eu rheolau er mwyn sicrhau bod rhwydwaith cymorth cariadus yn cael ei ddarparu i rai o bobl fwyaf agored i niwed cymdeithas. Rhaid i awdurdodau sicrhau bod parch dyledus yn cael ei roi i’n hawl i fywyd preifat a theuluol.”

DIWEDD