Mae’r Eisteddfod Genedlaethol yn cael ei chynnal yn Llanrwst ymhen llai na blwyddyn. Mae’r ŵyl arbennig hon yn rhan allweddol o strategaeth iaith Llywodraeth Cymru, felly mae Janet Finch-Saunders, Aelod Cynulliad Aberconwy, wedi bod yn galw yn y Senedd i Lywodraeth Cymru roi mwy o gymorth i’r ŵyl.
Bu Janet yn dadlau ers tro bod angen adeiladu gorsaf drenau dros dro ger y maes. Hefyd, ar ôl darganfod bod Llywodraeth Cymru wedi rhoi llai o gymorth ariannol i’r Eisteddfod eleni, mae Janet wedi galw am ragor o fuddsoddiad gan Lywodraeth Cymru er mwyn dileu unrhyw rwystrau ariannol i bobl sydd am fynychu’r digwyddiad sy’n para wythnos.
Meddai Janet:
“Fel fy etholwyr a thrigolion ledled Cymru, rwy’n edrych ymlaen at yr Eisteddfod y flwyddyn nesaf.
“Mae’n rhaid canmol cymunedau ledled Sir Conwy sydd wedi dod at ei gilydd i geisio cyrraedd y targed o £320,000 er mwyn helpu i dalu am y dathliad ardderchog hwn o iaith, diwylliant a doniau Cymru.
“Er bod pobl Sir Conwy yn chwarae eu rhan yn ddi-os, mae’n ymddangos i mi fod cefnogaeth Llywodraeth Cymru braidd yn wan.
“Mae’r cyllid sy’n cael ei ddyrannu i’r Eisteddfod Genedlaethol wedi gostwng i £697,300 eleni, ac nid yw wedi cynyddu’n sylweddol ers 2015-16.
“Mae difrifoldeb y sefyllfa yn amlwg o ystyried bod yr Eisteddfod yn rhan allweddol o’r strategaeth i gyrraedd miliwn o siaradwyr erbyn 2050. Felly, er mwyn helpu’r Eisteddfod i hyrwyddo’r Gymraeg a chael effaith gadarnhaol ar gynulleidfa leol a byd-eang, rwy’n awyddus i weld rhwystr ariannol sylweddol yn cael ei ddileu, sef cost tocynnau.
“Roedd mynediad am ddim yn llwyddiant mawr ym Mae Caerdydd, felly pam na all Llywodraeth Cymru gefnogi’r un polisi yn Llanrwst?”
DIWEDD
Cwestiwn ysgrifenedig yn y Cynulliad gan Janet Finch-Saunders AC i’r Farwnes Eluned Morgan, Gweinidog y Gymraeg a Dysgu Gydol Oes:
Faint o gymorth ariannol a roddodd Llywodraeth Cymru i Eisteddfod Genedlaethol Cymru yn 2015, 2016, 2017, a 2018, faint y bydd yn ei roi yn 2019, ac a yw Llywodraeth Cymru yn cydnabod y rôl allweddol y mae’r ŵyl yn ei chwarae o ran annog pobl i ddefnyddio a dysgu Cymraeg?
Ymateb y Gweinidog:
Mae Llywodraeth Cymru yn cydnabod y rôl allweddol y mae’r ŵyl yn ei chwarae o ran annog pobl i ddefnyddio a dysgu Cymraeg. Mae’r Eisteddfod Genedlaethol yn gwneud cyfraniad allweddol at gyflwyno Cymraeg 2050: Strategaeth y Gymraeg Llywodraeth Cymru, ac rwy’n llongyfarch yr Eisteddfod ar lwyddiant yr ŵyl fywiog eleni ym Mae Caerdydd. Cynhelir trafodaethau â swyddogion yr Eisteddfod dros y misoedd nesaf i ystyried sut mae Llywodraeth Cymru yn gallu cynorthwyo’r Eisteddfod i ddatblygu mentrau newydd dros y blynyddoedd nesaf.
Mae cyllid ar gyfer yr Eisteddfod gan Lywodraeth Cymru ar gyfer y blynyddoedd dan sylw fel a ganlyn:
2015-16: £603,000
2016-17: £627,000
2017-18: £739,900
2018-19: £697,300
Nid yw cyllid ar gyfer 2019-20 wedi’i gytuno eto.
Nodiadau: