Mae Janet Finch-Saunders, Gweinidog yr Wrthblaid y Ceidwadwyr Cymreig dros Newid Hinsawdd, Ynni a Materion Gwledig AS wedi mynd ati heddiw (19 Awst) i gondemnio cynllun cyllido gwirfoddol Llywodraeth Cymru i osod Teledu Cylch Cyfyng mewn lladd-dai, wrth iddi ddod i’r amlwg mai dim ond 1 cais llwyddiannus am daliad ariannol a welwyd ers iddo gael ei roi ar waith.

Yn ôl yr wybodaeth a oedd ar gael drwy gais Rhyddid Gwybodaeth, dim ond 8 o geisiadau ar gyfer grantiau gan ladd-dai sydd wedi’u derbyn drwy’r Cynllun Buddsoddi mewn Busnesau Bwyd. Nod 4 o’r rhaglenni hyn oedd ei gwneud yn bosibl i gael systemau Teledu Cylch Cyfyng neu uwchraddio systemau er mwyn monitro lles anifeiliaid. Ar hyn o bryd, mae 23 o ladd-dai gweithredol yng Nghymru. Roedd yr ystadegau mwyaf diweddar sydd ar gael i’r cyhoedd, a gyhoeddwyd yn 2016, yn awgrymu mai dim ond 8 a oedd ag unrhyw Deledu Cylch Cyfyng. Yn ôl yr adroddiad, roedd y rhain yn cynnwys y 3 safle mwyaf yng Nghymru.

Gan sôn am ddatgeliadau Rhyddid Gwybodaeth, dywedodd Janet:

“Mae’n hollbwysig bod ein hanifeiliaid yn cael eu trin â pharch ag urddas bob amser. Rydw i wedi synnu at y datgeliadau hyn, ac mae’n pwysleisio, unwaith eto, y ffaith bod dull Llywodraeth Cymru o ymdrin â’r mater hwn yn annigonol.

“Pan gafodd Gweinidog yr Amgylchedd Llywodraeth Cymru ei holi am wneud Teledu Cylch Cyfyng yn orfodol, dywedodd ei bod yn credu y dylid ystyried Teledu Cylch Cyfyng mewn lladd-dai dim ond os oedd dull cwbl wirfoddol yn annigonol.

“I siarad yn blaen, mae’r dull hwn nid yn unig yn annigonol – mae’n fethiant llwyr.

“Bydd Teledu Cylch Cyfyng mewn lladd-dai yn sicrhau bod camdriniaeth anifeiliaid yn cael ei ganfod yn gyflym a bydd unrhyw achosion yn cael y sylw priodol. Mae’r defnydd o’r dechnoleg hon wedi’i hystyried ers amser maith yn gam pwysig o ran sicrhau bod diogelu lles anifeiliaid ar y lefel uchaf yng Nghymru.

“Mae angen cymryd camau brys er mwyn cywiro’r sefyllfa hon, gan wneud y defnydd o Deledu Cylch Cyfyng yn orfodol mewn ardaloedd allweddol mewn lladd-dai yng Nghymru. Nid yn unig bydd hyn yn golygu y bydd ein deddfwriaeth yn cyd-fynd â deddfwriaeth Lloegr a’r Alban, bydd yn rhoi sicrwydd i’r cyhoedd hefyd bod safonau lles anifeiliaid uchel yn cael eu cynnal ar hyd a lled Cymru.”

“Bydd Teledu Cylch Cyfyng mewn lladd-dai yn sicrhau bod y camddefnydd o anifeiliaid yn cael ei ganfod yn gyflym ac yn cael ei drin. Mae’r defnydd o’r dechnoleg hwn wedi cael ei ystyried ers amser maith yn gam pwysig wrth sicrhau bod gennym y lefelau uchaf o ddiogelwch ar les anifeiliaid yng Nghymru . “Mae angen cymryd camau brys er mwyn cywiro’r sefyllfa hon, gan wneud y defnydd o Deledu Cylch Cyfyng yn orfodol mewn lladd-dai yng Nghymru. Nid yn unig bydd hyn yn dod â’n deddfwriaeth yn unol â’r Alban a Lloegr, bydd yn rhoi sicrwydd i’r cyhoedd bod safonau lles anifeiliaid uchel yn cael eu cynnal ar hyd a lled Cymru.”

DIWEDD

Nodiadau i Olygyddion: Cwestiynau ac Atebion Rhyddid Gwybodaeth

• Faint o grantiau y gwnaethpwyd cais amdanynt dan y cynllun hwn? 8
• Faint o grantiau y gwnaethpwyd cais amdanynt sydd wedi’u talu i ladd-dai hyd yma? 1
• Beth yw cyfanswm gwerth y grantiau a dalwyd hyd yma? £2689
• Faint o grantiau y gwnaethpwyd cais amdanynt hyd yma dan y cynllun hwn yn benodol i’w gwneud yn bosibl i weithredu neu ddiweddaru systemau Teledu Cylch Cyfyng er mwyn monitro lles anifeiliaid?4
• Faint o grantiau y gwnaethpwyd cais amdanynt hyd yma dan y cynllun hwn yn benodol er mwyn ei gwneud yn bosibl i weithredu neu ddiweddaru systemau Teledu Cylch Cyfyng sydd wedi’u talu hyd yn hyn? Beth yw cyfanswm gwerth y grantiau a delwyd i ladd-dai hyd yma dan y cynllun ar gyfer y diben hwn? £2689