Heddiw (9 Mehefin), siaradodd Janet Finch-Saunders AS – Aelod o Senedd Cymru dros Aberconwy – am ei siom gyda’r newyddion y bydd Gary Doherty, cyn Brif Weithredwr Bwrdd Iechyd Betsi Cadwaladr yn cael ei dalu o leiaf £188,000, wrth iddo weithio ar secondiad yn Lloegr.
Dyma’r diweddaraf mewn llu o ymrwymiadau cyllid drud i gyn aelodau staff neu staff sy’n gadael. Yn 2015, mynegwyd pryder gan Bwyllgor Cyfrifon Cyhoeddus y Senedd ynghylch y newyddion y byddai’r Bwrdd yn cyllido secondiad blwyddyn o hyd i Loegr i Trevor Purt, y cyn Brif Weithredwr.
Wrth siarad am y sefyllfa, dywedodd Janet:
“Dyma benderfyniad ariannol amheus arall gan y rhai sy’n rhedeg Bwrdd Iechyd Prifysgol Betsi Cadwaladr. Mae ein staff rheng flaen rhagorol yn haeddu gwell gan yr uwch dîm arweinyddiaeth lle mae gormod o lawer o reolwyr.
“Gyda chleifion yn aros wythnosau am lawdriniaethau angenrheidiol, dyw hi ddim yn iawn fod pobl y Gogledd yn gweld eu trethi’n cael eu gwastraffu ar secondiadau drud o Loegr gan staff sy’n gadael y Bwrdd. Mae hwn yn gur pen ariannol a does dim arwydd ei fod yn dod i ben.
“Dylai rheolwyr Bwrdd Iechyd Prifysgol Betsi Cadwaladr geisio arloesi yn hytrach nag ailadrodd camgymeriadau costus y gorffennol. Mae’n amlwg nad yw arweiniad Vaughan Gething AS a Llywodraeth Llafur Cymru wedi gwneud yr un iot i helpu’r Bwrdd i symud allan o fesurau arbennig.
“Mae’r Ceidwadwyr Cymreig wedi ymrwymo i gyhoeddi map cyfeiriad clir a chynhwysol i achub Bwrdd Iechyd Prifysgol Betsi Cadwaladr, o fewn mis o gymryd yr awenau. Bydd hyn yn adfer hyder y cyhoedd yn y Bwrdd, ac yn rhoi sylw eto i’r meddygon a’r nyrsys.”
DIWEDD
Llun: Luis Melendez