Croeso i’r e-bost wythnosol o’r newyddion diweddaraf o’r Undeb Ewropeaidd (UE) sydd yn rhoi cyflwyniad bras i’r datblygiadau diweddaraf yn yr UE sydd fwyaf perthnasol i Gymru a gwaith y Cynulliad.
Uchafbwynt yr wythnos fydd cyhoeddi’r cynigion deddfwriaethol drafft ar gyfer Cronfeydd Strwythurol yr UE rhwng 2014 a 2020, sydd o bwys mawr o ystyried gwerth y dyraniad cyfredol (tua £1.9 biliwn rhwng 2007 a 2013) o’r UE ar gyfer y ddwy raglen ranbarthol yng Nghymru. Caiff cynigion ar gyfer dyfodol y Polisi Amaethyddol Cyffredin, dogfen bwysig arall i Gymru, eu cyhoeddi'r wythnos nesaf (12 Hydref).
Yr wythnos diwethaf, cyhoeddodd y Comisiwn Ewropeaidd gynigion ar gyfer Treth Trafodion Ariannol Ewropeaidd yn sgîl ymgynghori a thrafodaethau gwleidyddol helaeth ar y pwnc. Hwn oedd un o benawdau’r anerchiad blynyddol am Gyflwr yr Undeb gan Jose Manuel Barroso, Llywydd y Comisiwn Ewropeaidd, gerbron Senedd Ewrop ar 27 Medi. Yn yr anerchiad, nododd ei flaenoriaethau ar gyfer y flwyddyn nesaf, wrth edrych ymlaen at Raglen Waith y Comisiwn Ewropeaidd ar gyfer 2012, a gaiff ei chyhoeddi yn yr wythnosau nesaf.