Heddiw, mae Janet Finch-Saunders, AS Aberconwy, wedi croesawu'r ffaith y bydd bwriad i beintio llinellau melyn ar hyd yr A470 yng Nglan Conwy yn destun ymgynghoriad.
Daw'r datblygiad cadarnhaol hwn yn dilyn llythyr a anfonwyd gan yr Aelod at Weinidog yr Economi, Trafnidiaeth a Gogledd Cymru, yn gofyn am eglurder ynghylch cynlluniau ar gyfer yr A470 tua'r gogledd yng Nglan Conwy.
Er mwyn ceisio mynd i'r afael â phroblemau gwelededd, mae Llywodraeth Cymru wedi llunio cynigion ar gyfer marciau ffordd newydd hyd ochr ogleddol yr A470 yng Nglan Conwy, ger Benarth Court.
Wrth sôn am y cynnig ac ymateb y Gweinidog, dywedodd Janet:
“Fel ymgyrchydd brwd dros ddiogelwch priffyrdd, rwy'n croesawu camau i wella gwelededd ar hyd yr A470 yng Nglan Conwy.
“O ystyried pryderon parcio, rwy'n falch bod y Gweinidog wedi ymrwymo i gadw hyd y cyfyngiadau mor isel â phosibl er mwyn lleihau nifer y llefydd parcio a gollir.
“Bydd y newid arfaethedig yn effeithio'n uniongyrchol ar nifer o drigolion ac unigolion lleol sy'n gyrru drwy'r pentref, felly mae'n hanfodol cynnal ymgynghoriad ffurfiol ar y cynnig. Bydd yn cael ei gynnal yr haf hwn.
“Yn dilyn y problemau gyda'r groesfan sebra, mae trigolion Glan Conwy yn gwybod yn iawn nad ydi gwelliannau priffyrdd Llywodraeth Cymru bob amser yn gweithio fel y dylai, felly rwy'n annog pawb i gael golwg ar y dyluniad.”
DIWEDD