Heddiw (27 Gorffennaf), mae Janet Finch-Saunders AS - Aelod o’r Senedd Aberconwy - wedi erfyn ar Lywodraeth Cymru i wneud mwy i agor rhwydwaith trafnidiaeth gyhoeddus Cymru i deithwyr nad ydynt yn deithwyr hanfodol a chymudwyr lleol.
Credir y byddai hyn yn helpu i ysgafnhau’r problemau a welwyd yn Eryri dros y penwythnos, pan gafodd oddeutu 60 o gerbydau eu troi ymaith o droed yr Wyddfa cyn 8am ddydd Sadwrn. Mae pryderon wedi’u mynegi gan etholwyr sy’n ei chael hi’n anodd cymudo i’w gwaith.
Cyngor Trafnidiaeth Cymru ar hyn o bryd yw bod pob taith ar drên ar gyfer 'gweithwyr allweddol a theithiau hanfodol’ yn unig. Mae gweithredwyr bysiau hefyd yn nodi problemau wrth iddynt geisio cynyddu eu gwasanaethau, a thynnodd Mrs Finch-Saunders sylw at hyn yn gynharach yn y mis.
Wrth drafod y broblem, dywedodd Janet:
“Gyda llety hunangynhaliol yn cael agor nawr, a rheol pum milltir fympwyol Mark Drakeford wedi’i diddymu o’r diwedd, mae Cymru wedi agor ei drysau i ymwelwyr mewn ymgais a fydd gobeithio’n helpu i osgoi colli’r holl swyddi yr ofnir eu colli yn y Gogledd.
“Mae hyn yn newyddion gwych i Landudno, sydd wedi’i chydnabod yn un o drefi glan môr gorau’r DU, ac sy’n un o drysorau ein cynnig twristiaeth ac sy’n gwneud cyfraniad enfawr ar ddod â £900 miliwn i Sir Conwy bob blwyddyn.
“Felly, rwyf wedi fy nigalonni o glywed yr honiadau bod ymwelwyr yn teithio i’r Gogledd ar drenau yn cael eu lluchio oddi ar drenau yn yr orsaf olaf yn Lloegr ar eu taith gyfreithlon i’w llety gwyliau yng Nghymru. Mae hyn yn golygu bod ymwelwyr yn gorfod defnyddio’u ceir i gyrraedd ein rhanbarth, ac mae hyn wedi gwaethygu problemau sy’n bodoli ers amser maith o ran parcio o gwmpas ein hatyniadau hardd.
“Rwy’n erfyn ar Lywodraeth Cymru i ail-agor yn ddiogel ein rhwydwaith trafnidiaeth gyhoeddus i deithio nad yw’n hanfodol, gan gyhoeddi’r canllawiau priodol i’n gweithredwyr bysiau a threnau, ynghyd â gyrwyr tacsis. Trwy wneud hyn yn ddiogel, byddai hyn yn ysgafnhau’r problemau a welwyd yn Eryri dros y penwythnos ac yn dod â busnes mawr ei angen i’n trefi glan môr.
“Bydd y newid angenrheidiol hwn hefyd yn helpu llawer iawn o breswylwyr lleol i gymudo i’r gwaith, drwy gefnogi cynnydd mewn opsiynau trafnidiaeth ar gyfer y rhai sydd eu hangen. Ni allwn adael i bobl y Gogledd deimlo eu bod yn cael eu hanwybyddu a’u hynysu gyda pharhad y gwasanaeth tila presennol.”
DIWEDD
Picture: Sunyu Kim/UnSplash